لايغرّك نهر ضيّج………. وانته ماتعرف سبح

شعر – د جليل البيضاني 

ولايغرّك نهر ضيّج وانته ماتعرف سبح
وخلي خوّانك بصفك
مايطير الطير لو طاح الجنح
ومن يجيك الزود والدنيا تصح
خلي بالك تره جوّاك السفح
الى صديق عزيز
…………………….
ارد انصحك لو خذت مني النصح
لاتصاحب ابد من وكتك يشح
ومن تطول سنين عمرك ..
لاتظل تمشي صفح
ومن تعامل ناس
خل وجهك سمح
ولو صرت رايه لعمامك
لاتظل تضبح ضبح
ولو چواك بيوم جرحك
لاترش جروح خلاّنك ملح
ولو وزاك الغيض خل صدرك فسح
ولاتهم بصواب غيرك
{ صواب البغيرك شطح }
ولو اجاك الحچي الماصخ
لايهمك من چلب كثر النبح
ولاتشيل السيف وحده
بليل تحتاج الرمح
ولاتشل جرح الچبير
وما يفيد خياط لو يكبر جرح
ولاتسير بليل خل مشيك صبح
ولاتعلّي سطوح بيتك
وجارك بصفك يظل ناصي السطح
وماتحصل غير رزقك
لو تظل تكدح كدح
ولايغرّك نهر ضيّج وانته ماتعرف سبح
وخلي خوّانك بصفك
مايطير الطير لو طاح الجنح
ومن يجيك الزود والدنيا تصح
خلي بالك تره جوّاك السفح